Індыйскія дзяржаўныя нафтаперапрацоўчыя заводы спынілі закупкі расейскай нафты на мінулым тыдні, паколькі зьніжкі ў гэтым месяцы скараціліся, а прэзыдэнт ЗША Дональд Трамп папярэдзіў пра дадатковыя санкцыі за закупкі нафты ў Масквы, паведамляе агенцтва Reuters са спасылкай на свае крыніцы ў нафтаперапрацоўчай галіне.
Індыя, трэці па велічыні імпартэр нафты ў сьвеце, таксама зьяўляецца найбуйнейшым пакупніком марской расейскай сырой нафты.
Дзяржаўныя нафтаперапрацоўчыя заводы краіны — Indian Oil Corp (IOC. NS), Hindustan Petroleum Corp (HPCL. NS), Bharat Petroleum Corp (BPCL. NS) і Mangalore Refinery Petrochemical Ltd (MRPL. NS), — не зьвярталіся па расейскую сырую нафту на працягу апошняга тыдня ці каля таго, паведамілі Reuters чатыры крыніцы, знаёмыя з плянамі нафтаперапрацоўчых заводаў па закупках.
IOC, BPCL, HPCL, MRPL і фэдэральнае міністэрства нафты Індыі пакуль не адказалі на запыты Reuters аб камэнтарыях.
Як адзначае Reuters, прыватныя нафтаперапрацоўчыя заводы Reliance Industries (RELI. NS) і Nayara Energy зьяўляюцца найбуйнейшымі пакупнікамі расейскай нафты ў Індыі, але дзяржаўныя нафтаперапрацоўчыя заводы кантралююць больш за 60% агульных магутнасьцяў Індыі па перапрацоўцы нафты ў 5,2 мільёна барэляў у дзень.
14 ліпеня Трамп пагражаў 100% тарыфамі на краіны, якія купляюць расейскую нафту, калі Масква не дасягне мірнага пагадненьня з Украінай.
Форум